Se vi sekvas la novaĵojn de Aperu, vi eble rimarkis pri ŝanĝo en la ĉefpaĝo de aperu.net.

Nun aperas kelkaj medaloj: oraj, arĝentaj kaj bronzaj apud kelkaj eroj en la ĉefa enhava listo. Kiel ni diris jam kelkfoje, ni disvolivigis mezuron de populareco, kaj nun la rezulto estas videbla.

Laŭ la nunaj agordoj, ĉiutage ni identigas la plej popularajn afiŝojn de la pasintaj semajnoj (oraj afiŝoj), du fojojn ĉiutage la plej popularajn de pasintaj tagoj (arĝentaj afiŝoj), kaj eĉ pli ofte, la plej popularaj de pasintaj horoj (bronzaj afiŝoj).

Ni montras en la ĉefpaĝo ilin ĉiujn, kaj plenigas la reston de la listo per la lastatempe aktivaj afiŝoj (tio estas, laste spektitaj, ŝatitaj, prikomentitaj, ktp). Tiel, rigardante medalitajn afiŝojn en Aperu, eĉ se ne ĉiuj estas necese bonkvalitaj aŭ nepre interesaj, oni trovas utilan filtritan liston, kiu igas la ĉefpaĝon de Aperu iusence pli interesa ol Tubaro, kies celo estis ĉiam montri ĉiujn videaĵojn, kiuj aperas en Esperanto aŭ pri Esperanto. Kaj inter tiu “ĉiuj”, bedaŭrinde, estas ankaŭ multaj malaltkvalitaĵoj. Kompreneble, Indas havi lokon por kolekti kaj montri ĉion, sed indas ankaŭ sistemo kiu iel filtras pli “interesan” enhavon.

Kiel vi jam scias, nuntempe nia sola aktiva sub-projekto estas Tubaro, kiu temas pri videaĵoj. Baldaŭ, kiam venos pli da projektoj kun aliaj enhavo-specoj, Aperu kolektos kaj filtros la plej popularajn afiŝojn tra ili ĉiuj, kaj montros liston de tiuj en la ĉefpaĝo. Ni pensas, ke tiam ĝi estos eĉ pli interesa! 🙂

Kion vi pensas pri la nova listo? Ĉu ĝi estas interesa kaj rekomendinda al hazardaj vizitantoj?