Saluton!

Dum longa tempo ni ne afiŝis novaĵon, sed ni multe laboris pri granda ŝanĝo. Krom tio, koincide, ni havas novaĵon pri konkurso, en kiu ni partoprenis lastatempe!

Pasintjare, la Valencia Asocio lanĉis konkurson pri projektoj por disvastigo de Esperanto (Jen la afiŝo). Laŭ ili mem informas, kelkaj verkoj prezentiĝis, kiuj proponis diversajn ideojn pri kiel disvastigi Esperanton. Inter ili estis nia propona artikolo, kiu temis pri utiligo de interretaj amuzado-platformoj, kaj specife, tiuintence disvolvigi la projekton Aperu!

Nun, ni fieras informi ke ni gajnis la duan lokon en tiu konkurso! Legu la novaĵon ĉe la oficiala afiŝo (ni aperas kiel la verko n-ro 10 proponita de Pablo Busto, skribite kiel Paul Busto). Kiel la oficiala paĝo diras, la premioj estas mono, kaj ni gajnis 600 eŭrojn kiel la dua venkinto en la konkurso.

Kion ni faros kun tiu premio?

Ni uzos la monon de la premio por pluraj aferoj rilate al la reto de Aperu! kaj siaj subprojektoj. Tio inkluzivas pagi la evidentajn bazajn kostojn por la daŭripovo de la projekto, precipe la retgastigado, sed krom tio, antaŭenigi la disvolvigon de la projekto, kio inkluzivas:

• Krei novajn subprojektojn de Aperu! por kolekti aliajn specojn de esperanta enhavo, aldone al videaĵoj.
• Aldoni novajn funkciojn en Tubaro, ekzemple, subteni pliajn platformojn en Tubaro aldone al YouTube, ebligi aŭtomatan diskonigadon kaj sciigadon de novaj afiŝoj tra pliaj platformoj, ekzemple WhatsApp, Twitter/X, Mastodon ktp, simile al kion ni faras en nia telegrama kanalo.
• Plibonigi la ekzistantajn funkciojn, ekzemple plifaciligi komentadon ktp, kaj
• Forigi cimojn, kompreneble!

Inter tiuj planitaj “novaj funkcioj”, tamen, ankaŭ estas sufiĉe grava, granda kaj ekscita afero, kiun ni priplanas kaj prilaboras de antaŭ longe…

…kaj tio temas pri:

📢 premii la plej popularajn filmojn ĉe Tubaro! 🏅💰

Jes! Tio vere estas nia plano!

Pli detale, la plano estas, mezuri “popularecon” de afiŝataj filmetoj per iu algoritmo, kaj laŭ tiu mezuro premii la plej popularajn filmetojn, kaj tiel, espereble, instigi kaj subteni la kreantojn. Ni jam atingis bonajn rezultojn pri la algoritmo kalkuli la Popularecon, sed ankoraŭ ne tiel bona kiel ni ŝatus, tial la rezultoj ne ankoraŭ videblas ĉe aperu.net. Ĉiuokaze, oni povas rigardi la eksperimentajn rezultojn de la algoritmo en telegrama kanalo. En venonta blogafiŝo ni informos pri detaloj pri tiuj premioj.

Ni intencas, ke tiu nova funkcio helpos pli popularigi Tubaron kaj konsekvence filmetojn en Esperanto. Ni esperas, ke tio helpos ne nur popularigi Esperantan enhavon inter esperantistoj, sed ankaŭ instigi esperantistojn kaj neesperantistojn kunlabori por krei pli altkvalitajn esperantaĵojn.

Ni ne povas atendi ĝis montri la rezultojn al vi, kaj ni esperas ke tio plaĉos vin kaj helpos vin trovi pli mojosan kaj altkvalitan enhavon. Sed momente, nenio pli pri tio.

Ni gratulas al la aliaj partoprenintojn en la konkurso ĉe la Valencia Asocio, ĉefe al Françoise Noireau (La venkinto) kaj ankaŭ al Favio Silva kaj Antonio Alcazar (tria kun-venkintoj). Ni esperas ke ĉiuj prezentitaj ideoj kaj projektoj helpos disvastigi Esperanton kaj esperantaĵojn ne nur inter esperantistoj sed al ĉiuj homoj.